Hitzak: Iñaki Beristain
Musika: Herrikoia
Jaunaren ordua da,
ez da berandua:
etorrera gertatu
zaigu Abendua.
Kaltearen zauritan
kontsolamendua:
Jainkoa munduan da,
zeru da mundua.
Ahaltsuaren berba
orain hitzik-eza,
aberatsak emazte
hartu du pobreza.
Zer Jainko dugun Jauna
honetatik pentsa,
maitez besarkatzeko
gizonon pobreza.
Dena egin zuena
Birjinak egin du,
dena zezakeenak
ezertxo ezin du.
Munduko sailkapen ta
neurriak astindu:
Jainkoa ta gizona
zaizkigu berdindu.
Zer da handi, zer txiki?
Zer goi ta zer behea?
Zeru da ta mundu da
Belengo estalpea.
Jainkoa ta gizona
ezkon-elkartea!
Harriduraz isildu
ta goza bakea.