Hitzak: Iñaki Beristain
Doinua: Herrikoia
Garizumako basamortuan
zu ta gu aurrez-aurre;
bekatariak garela, Jauna,
esan beharrean gaude.
Maitez hautatu gintuzun, Jauna,
zorioneko sortaurre;
hautapen horri sasi-liluraz
guk egin diogu aurre.
Jauna, ez zaude maitasun hura
betiko ahazteko,
basamortura bildu gaituzu
berriz maitatzen hasteko.
Zure errukiak duen indarrez
hartu gaitzazu menpeko,
ta gaztetako maitasun hura
berriro jantzi soineko.
Zuk bihotzera hitz egin, Jauna,
zure mintzo gordea,
onera itzul iezaiozu
maitasunari kordea.
Gaiztoak izan gatzaizkizu, bai,
gaur damuz gaude ordea:
gazte-maitasun on hura bihur
zintzoago ta hobea.
Basamortuko bakardadean
zuri gaude begira,
zure ahoko hitzak benetan
bizidun hitzak baitira.
Limosnaz, barauz, uko eginez
zure emaztea ari da:
pazko-ur garbiz barkazioa
isuri zure herrira.