Gurutzea daramagu

Gurutzea daramagu,
gurutzeak garamatza:
bihotz-berritze bidea
garizumako aldatza.
Esperantzaren besotan
gurutzeak garamatza.

Gurutzeak garamatza,
gurutzea daramagu:
penitentzizko zakukiz
jantzi beharra daukagu.
Pazkoaren ametsetan
gurutzea daramagu.

Gurutzea daramagu,
gurutzeak garamatza:
pazkoa baitu fedeak
bere argizko ardatza.
Ardatz horretan jiraka,
gurutzeak garamatza.

Gurutzeak garamatza,
gurutzea daramagu:
gurutzearen herria
bataiotik baikara gu,
bokazioa izaki
gurutzea daramagu.

Gurutzea daramagu,
gurutzeak garamatza:
pozik jarraituz Kristoren
Kalbarioko oinatzak.
Aita on, zuri kantuka
gurutzeak garamatza.